SOLAR FAKE, VERSUS live in Zwickau Alter Gasometer 08.02.2020

gschriebe vo Marko Jakob
übersetzt vo Samantha N.

Am 08.02.2020 isch in Zwickau eis vode letzte Konzert vo de “You Win, Who Cares” Tour vo Solar Fake aahgstande. Nachem überragende Erfolg vo de Dütschlandtour i 10 verschiedene Städt letzt Jahr, wird d’Tour im 2020 jetzt wiitergfüehrt.

Dadefür händ sich Solar Fake vor allem Städt uusgsuecht, wo sie nonig live gspielt hend. Eis vo dene Konzert het i einere vo de schönste Konzertlocations vo Dütschland stattgfunde – im Alten Gasometer in Zwickau.
Es het bim Konzert in Zwickau es Meet & Greet fürd Mitglieder vom Shadowplay e.V. Fanclub geh. So händ öppe 30 Bsuecher dMöglichkeit gha, dLocation scho früener zbetrete und sich dänn nach einige Fötelis und Gspräch mit de Band, au die beste Plätz vor de Bühni zsichere.

Als Supportband isch Adam is a Girl us Berlin plant gsii – d’Band het allerdings wegenere Erchrankig vode Sängerin müesse absäge.

VERSUS

De Part vom Opener het denn dBand Versus vo Dresden übernoh. Sie händ erst zwei Täg vorem Uuftritt Bscheid becho, dass sie Teil vode Solar Fake Tour sii werdet. Am halbi Nüüni isches denn richtig loosgange mit de Livemusik. De André, Sänger vo de Band, het sich am Aafang uf de Empore “versteckt* und het de Anfang vom erste Lied vo det uus gsunge.
Versus hets guet gschafft, das am Aafang no recht lustlos würkende Publikum wach zrüttle. Öppe abde Hälfti vom Konzert isch denn sogar fliissig mitklatscht worde.
De André isch wie fast immer barfuess uf de Bühni stande und hets gschafft, en Draht zum Publikum uufzbaue. Er het sogar e Rägebogeflagge uf e Rundreis dur dMängi gschickt.
Näbel und schöns Liecht hent de Uuftritt vom Electro-Pop Duo us Sachse gsüümt.
Bim letzte Lied het de Anfré dBüühni verlah und het “Welle Sieben” uf em Bode sitzend zmitzt im Publikum gsunge. Nach 40 Minute hend sich dMusiker bi de Fans fürs Zuelose und Mitmache bedankt.

Setlist Versus
01. Intro
02. Freakwaves
03. Schenk Mir Zeit
04. Immer Dann
05. A Memory In Frames
06. Schaf vs. Wolf
07. Love 2 Go
08. Into The Galaxy
09. Welle Sieben

Solar Fake

Nachem Uuftritt vo Versus isches nur öppe 20 Minute gange, bis de Jens, de Sven und de André dBüühni betrette hend. Doch de André Feller isch ned wie suscht amigs am Keyboard gstande, sondern het bi “Sick of you” dBassgitarre gspielt. Er het währed em Konzert immer wieder sInstrument gwechslet und bide Songs vo “You Win, Who cares” vorwiegend Bass gspielt.
De Jens isch hüt mit em Schlagzüüg sehr wiit an vordere Rand vode sehr chliine Bühni gruckt. DFans het das jedoch überhaupt ned gstöört. Im Gegeteil: je nöcher drah am Gscheh, desto besser.
Ide am Aafang recht chüele Halle het dBand em Publikum sofort mit richtig Tempo iigheizt – no vor “No Apologies” het de Sänger Sven sini Jacke abzoge.
DHalle isch bi Solar Fake komplett voll gsi; Die wunderschön, rund Empore isch aber leider zue gsii. DFans hend fast ununterbroche tanzt – erst bi “I don’t want you here” und “Invisible” isches denn bizli ruhiger worde.
Bi “Not what I wanted” isch denn aber wieder richtig Post abgange unds Zwickauer Publikum het alles geh.
Solar Fake het im Grosse und Ganze die gliiche Songs wie susch amigs gspielt. Nur dReihefolg het im Vergliich zum Vorjahr gänderet. SLied “Anything you wnat” isch aber scho sitemene Jahr nüme gspielt worde und isch au am Vortag in Leipzig ned im Programm gsii.
Au sPixie Cover “Where is my Mind” het Solar Fake au nonig allzu oft debii gha.
DBand arbeitet inzwüsche au scho wieder bis intensiver a neue Songs – aber obs no vorem Endi vo 2020 en Nachfolger vo “You Win Who Cares” geh wird, blibt offe.

Mit “My Spaces” het nach düütlich über zwei Stund Spielziit en tolle Konzertabig inere Wundervolle Location gändet. DReis uf Zwickau het sich uf jede Fall glohnt.

Setlist Solar Fake
01. Sick Of You
02. No Apologies
03. Reset To Default
04. Under Control
05. Here I Stand
06. A Bullet Left For You
07. All The Things You Say
08. I Don’t Want You In Here
09. Invisible
10. Not What I Wanted
11. More Than This
12. Parasites
13. Too Late
14. The Pain That Kills You Too
15. If This Is Hope
16. Anything You Want
17. I Hate You More Than My Life
18. Observer
19. Where Is My Mind
20. Under The Skies
21. Just Like This
22. Stay
23. Papillon
24. Where Are You
25. My Spaces

Gallery Versus

Gallery Solar Fake